Novas

REDE participa no Evento Internacional Transfronteirizo de peche do proxecto MarRISK

Os días 19 e 20 de outubro, na Cidade da Cultura de Santiago de Compostela, tivo lugar o Evento Internacional Transfronteirizo de peche do proxecto MarRISK. En dito evento contouse coa participación dos distintos socios do proxecto, entre os que se encontra o grupo de investigación REDE, así como de stakeholders e observatorios oceánicos.

Na primeira xornada,  contouse coa intervención de representantes de distintos observatorios oceanográfico costeiros de España e Portugal (RAIA, SOCIB, Ocaso, Plocan, Euskoos e Madeira). Estes observatorios, que se encontran en distintas fases de desenvolvemento, puideron intercambiar experiencias e reflexionar sobre os seus futuros desafíos e oportunidades.

A segunda, e última xornada, centrouse na presentación dos principais resultados de MarRISK. Este proxecto, enmarcado na convocatoria de Cooperación Transfronteiriza Galicia-Norte de Portugal (POCTEP-INTERREG), pretende asegurar un crecemento intelixente e sostible das zonas litorais de Galicia e Norte de Portugal mediante a avaliación dos riscos costeiros máis importantes e a mellora da resiliencia nun escenario de cambio climático.

Neste contexto, Carlos Rodríguez, responsable da Unidade de Transferencia e Apoio á Investigación de REDE, expuxo os traballos realizados polo grupo de investigación, coa inestimable colaboración da Autoridade Portuaria de A Coruña, no marco da actividade 3 deste proxecto, consistentes no desenvolvemento dunha ferramenta para a mellora da adaptación ao cambio climático do Porto Exterior de A Coruña. Esta ferramenta, con potencial de ser extrapolada a outros portos, permite identificar a marxe de mellora, en termos de adaptación, e focalizar os esforzos para a mellora da resiliencia do porto nun contexto de Cambio Climático.

Seguidamente, tivo lugar a intervención de Andrés Guerra, xefe do Departamento de Sostibilidade da Autoridade Portuaria de A Coruña. Na súa presentación, destacou a utilidade de dita ferramenta, así como as medidas implantadas trala súa aplicación con resultados positivos na mellora da capacidade de adaptación.